Phablet គឺជាទូរស័ព្ទទំនើបដែលមានទំហំអេក្រង់លើសពី 5-inch និងក្រោម 7-inch ។ ដោយឡែកបន្ទាប់ពីទូរស័ព្ទប្រភេទនេះកំពុងចាប់ផ្ដើមទទួលបាន ប្រជាប្រិយភាពខ្លាំងឡើងៗនៅក្នុងទីផ្សារឧបករណ៍ទំនើប គេសង្កេតឃើញថា មានក្រុមហ៊ុនមួយចំនួនក៏បានព្យាយាមផលិតចេញនូវទូរស័ព្ទប្រភេទ phablet នេះផងដែរ ។ ហើយថ្មីៗនេះក្រុមហ៊ុន Samsung ថែមទាំងបន្ថែមជម្រើសទូរស័ព្ទ phablet ដោយប្រកាសចេញនូវស្រឡាយថ្មី Galaxy Mega ទៅលើស្រឡាយដែលកំពុងមានសម្រាប់ Galaxy Note ទៀតផង ។
យ៉ាងណាមិញកាលពីពេលកន្លងទៅនេះក្រុមហ៊ុន LG ក៏ទើបតែបានប្រកាសចេញនូវ Optimus G Pro ដែល មានអេក្រង់ 5.5-inch និងជា phablet ថ្មីដែរ ប៉ុន្តែទូរស័ព្ទនេះត្រូវបានក្រុមហ៊ុនព្យាយាមបន្តហៅជាប្រភេទ ទូរស័ព្ទទំនើបធម្មតា (Smartphone) ។ ក្នុងចំណោមក្រុមហ៊ុនផលិតទូរស័ព្ទធំៗ ក្រុមហ៊ុន HTC ត្រូវបានគេរាយការមកថា ពេលនេះក្រុមហ៊ុនមានគម្រោងនឹងប្រកាសចេញនូវទូរស័ព្ទប្រភេទ phablet ថ្មីដែលមានអេក្រង់ 5.9-inch កម្រិតភាពច្បាស់ Full HD និងដំណើរការដោយ Android ដែលបច្ចុប្បន្នទូរស័ព្ទនោះមានឈ្មោះលេខកូដថា T6 ។
លក្ខណសម្បត្តិបែបបច្ចេកទេសរបស់ HTC T6 ៖
- អេក្រង់ 5.9-inch
- កម្រិតភាពច្បាស់ Full HD
- កាមេរ៉ាថតរូបបំពាក់ដោយបច្ចេកវិទ្យា UltraPixel និង OIS
- កាមេរ៉ាមុខ 2.1MP
- CPU quad-core 2.3GHz MSM8974
- RAM 2GB
- អង្គផ្ទុកទិន្នន័យជាប់ម៉ាស៊ីន 16GB
- ថាមពលថ្ម 3,300mAh
- និងដំណើរការដោយប្រព័ន្ធប្រតិបត្តិការ Androd Key Lime Pie
បើយោងទៅតាមលក្ខណសម្បត្តិខាងលើ ទូរស័ព្ទទំនើប HTC T6 នឹងក្លាយជាប្រភេទ phablet ថ្មីដែលជាគូប្រកួតប្រជែងយ៉ាងធំរបស់ Samsung Galaxy Note III ដែលជិតមកដល់នាពេលខាងមុខ ។ ហើយតាមការប៉ាន់ស្មានទូរស័ព្ទ HTC T6 គឺប្រហែលជានឹងត្រូវប្រកាសចេញនាចុងឆ្នាំ២០១៣ នេះ ៕
ប្រភព៖យល់ព្រម
No comments:
Post a Comment